Rydym yn croesawu cyhoeddiad heddiw o adroddiad terfynol Pwyllgor Plant, Pobl Ifanc ac Addysg y Senedd Effaith COVID-19 ar blant a phobl ifanc. Mae'r adroddiad yn cydnabod bod pobl ifanc wedi cael eu heffeithio'n fwy nag unrhyw grŵp arall yn ystod y cyfnod anodd hwn.
Dywedodd Cadeirydd ColegauCymru, Guy Lacey,
“Wrth i ni ddechrau ar gyfnod o adferiad, rydym yn cydnabod bod y flwyddyn ddiwethaf wedi cael effaith negyddol sylweddol ar bobl ifanc o bob rhan o Gymru. Mae colegau addysg bellach wedi gweithio’n ddiflino dros y 12 mis diwethaf i sicrhau bod y gefnogaeth addysgu, dysgu a lles priodol wedi’i darparu, yn enwedig i’n dysgwyr bregus.”
Wrth i'r Senedd bresennol ddirwyn i ben, mae'r adroddiad yn gwneud argymhellion ar gyfer mwy o ddarpariaeth iechyd meddwl a chorfforol ac mae croeso i hyn hefyd. Mae'r argymhellion yn adlewyrchu themâu allweddol yn ein Hargymhellion Polisi ar gyfer Llywodraeth nesaf Cymru.
Ychwanegodd Cyfarwyddwr Polisi a Materion Cyhoeddus ColegauCymru, Dr Rachel Bowen,
“Ein blaenoriaeth o hyd yw iechyd, diogelwch a dilyniant dysgwyr. Gyda chyllid a chefnogaeth ddigonol a pharhaus, gall y sector addysg bellach yng Nghymru fod yn offeryn gwerthfawr i helpu ein dysgwyr ôl-16 i ffynnu a llwyddo mewn byd ôl-Covid. Mae'n hanfodol bod Llywodraeth nesaf Cymru yn canolbwyntio ar ddarparu addysg ac nid ar ad-drefnu strwythurol diangen a chostus yn y maes ôl-16.”
Gorffennodd Mr Lacey,
“Rydym yn arbennig o ddiolchgar am y cyfraniad a wnaed gan Gadeirydd y Pwyllgor, Lynne Neagle AS, sydd wedi hyrwyddo cau'r bwlch yn y ddarpariaeth rhwng ysgolion a cholegau, a'i ffocws diflino ar iechyd meddwl plant a phobl ifanc.”
Gwybodaeth Bellach
Datganiad i'r Wasg Senedd Cymru
Rhaid i lesiant plant a phobl ifanc fod yn ganolog i adferiad COVID-19
24 Mawrth 2021
Argymhellion Polisi ColegauCymru ar gyfer Llywodraeth nesaf Cymru
Llwyddiant yn y Dyfodol: Argymhellion Polisi ar gyfer Llywodraeth nesaf Cymru Mewn Addysg Ôl-16, a Dysgu Gydol Oes i Gymru
Mawrth 2021
